Life
Baba Bulhe Shah – پڑھ پڑھ عالم فاضل ہویا
پڑھی نماز تے نیاز نہ سِکھیا
تیریاں کِس کَم پڑھیاں نمازاں
علم پڑھیا تے عمل نہ کیتا
تیریاں کِس کَم کیتیاں واگاں
نہ کَہر ڈِٹَھا نہ کَہر والا ڈِٹَھا
تیریاں کِس کَم دِتیاں نیازاں
بُلھے شاہ پتہ تَد لگ سی
جدوں چِڑی پَھسی ہتھ بازاں
کھا آرام تے پڑھ شکرانہ
کر توبہ ترک ثوابوں
چھڈ مسیت تے پکڑ کنارہ
تیری چُھٹے جان عذابوں
نہ کہو کلمہ جہیڑا کہندا مُنکر
وے تو ہو روں اِک ثوابوں
بُلھے شاہ چل اُتھے وسیے
جِتھے منع نہ کرنڑ شرابوں
سِر تے ٹوپی تے نیت کھوٹی
لینا کی سِر ٹوپی تَرھ کے؟
تسبیح پھِری پر دِل نہ پھِریا
لینا کی تسبیح ہتھ پَھڑ کے
چلِے کیتے پر رب نہ ملیا
لینا کی چِلیاں وِچ وَڑھ کے
بُلھے شاہ جاگ بِنا دُدھ نہیں جمندا
پانویں لال ہووے کڑھ کڑھ کے
پڑھ پڑھ عالم فاضل ہویا
کدے اپنڑے آپ نوں پڑھیا نہیں
جا جا وَڑدا مسجداں مندراں اندر
کدے مَن اپنے وچ وَڑیا ای نہیں
ایویں روز شیطان نال لڑدا
کدی نفس اپنڑے نال لڑیا ای نہیں
بُلھے شاہ اسمانی اُڈدیاں پھَڑدا ایں
جہڑا کہر بیٹھا اونوں پھڑیا ای نہیں
————————————-
بلھا کی جاناں میںکون
نہ میںمومن وچ مسیتان، نہ میںوچ کفر دیان ریتاں
نہ میںپاکاں وچ پلیتاں، نہ میںموسیٰ نہ فرعون
بلھا کی جاناں میںکون
نہ میںاندر بید کتاباں،نہ وچ بھنگاں نہ شراباں
نہ وچ رنداں مست خراباں، نہ وچ جاگن نہ وچ سون
بلھا کی جاناں میںکون
نہ وچ شادی نہ غمناکی، نہ میںوچ پلیتی پاکی
نہ میںآبی نہ میں خاکی، نہ میںآتش نہ میں پون
بلھا کی جاناں میںکون
نہ میںعربی نہ لاہوری، نہ میںہندی شہر نگوری
نہ میں ہندو ترک پشوری، نہ میںرہندا وچ ندون
بلھا کی جاناں میںکون
نہ میںبھید مذہب دا پایا، نہ میںآدم حوا جایا
نہ میںاپنا نام دھرایا، نہ وچ بیٹھن نہ وچ بھون
بلھا کی جاناں میںکون
اول آخر آپ نوں جاناں، نہ کوئی دوجا ہور پچھاناں
میتھوں ہور نہ کوئی سیانا، بلھا شاہ کھڑا ہے کون
بلھا کی جاناں میںکون
